سمحو ليا نحكي ليكم واحد القصة
كان ياما كان في قديم الزمان واحد العجوزة زارعة بانانا حدا سودانية
كيف ماتتعرفو البنان حلو والسودانية طعمها لا يخفى على احد
كانت كل صباح العجوزه تتجي حدا البنانا وتبقى تغني ليها وتقوليها وقتاش يا بناناتي يجي الوقت ونقطفك بيدي ونتمتع بحلاوتك
والسوداينه متديهاش فيها وهي تغير من البنانا قالت اش ندير مندير غاديه نشوف شي حل اللي يخلي هد العجوزه ماتبقاش تديها في هد البنانا العوجة وهي تستخدم معاها اسلوب الزن على الودنين وكيف ماتتعرفو الزن على الودنين مفعولو اقوى من السحر
السودانية قربات من البنانا ودارت ليها دموع التماسيح
البنانا: مالك اختي ياك لاباس علاش تتبكي
السودانية: تنبكي عليك وعلى حظك العوج
البنانا:علاش اختي ياك لاباس مالني:
السودانية:معرفتيش مالك؟ غيجي واحد النهار وتفارقي عليا
البنانا:لهلا يجيب فراق اختي علاش اش غادي يفرقنا
السودانية: غادي تقطفك العجوزة وتاكلك وتهرشك بسنينتها اللي بقات عندها ما يبقى فيك والو حتى قشورك غادين يعطيوهم علف للبهايم
البنانا:ناري ياختي خلعتيني واشنو الحل دابا
السودانية: الحل ساااااااااااااااااااااااااهل ماهل قربي ليا زيدي قربي تي قربي كثر مالكي خايفه لصقي لصقي في جنابي حتى تلقمي مني ويولي مذاقك حااااااار وديك الساعه الشيبانيه مغتلقى ماتاكل فيك وتخليك عايشة في امان
البنانا مسيكينه على نيتها قربات ولصقات ومع مرور الايام ولات ريحة الحرورية تعطعط منها وكحالت
والشيبانيه مابقات تقرب ليها
واحد النهار الشيبانيه جالسه في دارها تتمشط الزغيبات اللي بقاو في شعرها وهي تقول في خاطرها فين ايااااااااام زمان شعري كان يتضرب بيه المثل اما دابا كلو طاح بقاو فيه جوج لانطيرات ماشادين لا المغرب لا دوزيم
خاصني ندير ليه شي تلبيخة باش يخلف
الشويبينيه قلبت ملقات متلبخ متبان ليها غير البنانا قالت غاديه ندقها في المهراز ونلبخها لشيكيكتي حيت البنان الحار تيخلف الشعر
وشدات البنانا مسكينه ودق يا مادق دوزات عليها العذاب في ذاك المهراس الصقع
اما مولاتي السودانيه باقا تتبندر الشويبينيه مخلياها غير زينة حيت لونها حمر وتيسر الناظر
ومشات خبيرتي مع الواد وانا بقيت مع بنات وولد الجواد
نتمنى تكون نالت اعجابكم